Sir 13

1 Mundu kalaro ndobabi ngago í̠ gime yidegola í̠naga giha para haga bulebira. Anidagua dege wali agali mana ko biaga bu karu baba mandagi haga hariyagua nde í̠bi wali agali ko biaga uruni ale dege holebere. 2 Mbirale í̠na yaraga holene gendabi ngago yaraga holene manda nabibe. Ani bialu wali agali í̠ dindiha lowa daligaore howa muni mbiraleru í̠na ngego wu bolanguahe kago baba mandagi nahabe. Todobene be dindime wabini ngago todobene be ainime wabini ngagola mandagi ngeria dindime wabini biago pambu lolebirago mandagi nawibe. 3 Muni mbirale dewawi homogo kagome mana lehe ngago bialu howa mana lehe biyagonaga bi nagalone mine howa bi ngago lalu holebira. Tigua wali agali yagibano karuhondo mana ko biyagua nde yagibano uruni tigua ko bini ndo ngagoyu ai tini genda yidago dambi halu tigua dege daraba lolene nga laga. 4 Homogo karume í̠naga mbirale ti hame layagua la nabi bame yamiaga. Ani bialu í̠ha mbirale tubagiho kegola ibugua í̠ erembira ngulebira. 5 Í̠ha muni mbiraleru yu hariyagua ibugua uruni mo hole bialu nai holobada manda nabi howa mo holebi nai ha bialu í̠ heba mandagi holeberebi. 6 Ani howa í̠hondo ibu biamogo bia layagua henene ndo ke̱ halu í̠ mo hondo howa lolebira. Ani lowa ibugua í̠hondo bi bayaleore langialu lalu, I̱na í̠ mbirale mbira biamogo bulene ngabe lalu hole holebira. 7 Ibugua ohowa í̠ mo taga holenaga tomo dewa nabelo ngulebira. Anigo o bulubadagoni í̠naga mbirale ngeru nai holenaga ani bulebira. Ibugua halu kiru tebirubi ani dege bialu howa mani í̠hondo oba holebira. Ani bialu í̠ lone ngola hayagua nde í̠ha tawe mbirale mbira hale halu manda bulene hame nalolebira. Ibunaga ma ema bima polebira.

8 Tigua í̠ mo hondo harago nahende howa í̠ lulu mini nawi howa bialu keria í̠ni mo taga holenego de hondo habe. 9 Agali haguane mbira kagome í̠ olalu ibu layagua ibu hongo howa ibuore lelo emene hondo habe. 10 Ibugua í̠ bo taliatagi holigo í̠ abale polene nawi. Ani bialu ibugua í̠ embeda holigo í̠ kanduiaha nabirabe. 11 Agali uruni ale kago í̠naga nenege mandagiore ibagabu holenebi libu te lo holenebi bayale kabe tobaho holeni nahabe. Ani bialu bi dewaore ibu degeme lalu holebirago henene larabe toba nahabe. Ibugua bi te dewa lalu í̠ abidabe hondole bahandalu bi lolebirago manda bu habe. Libu bi lalu oba harabigo í̠naga mana abidabe hondolenaga biagago manda bulene nga.

12 Mbirali ibugua te libuni hangu howa lenego wali agali hale helo lo yu ibaga bialu heagua ogoni ibu mendeali dara nahaga ka. 13 Ani biaga kagome í̠ mo ko halubi garabaya helolenebi ibugua gi nahe howa tanabi bulenego biai holebira. ^{▼▼(13.13-14)Mbuga alatawe gilibu wini ngagoha bi marubi hobane ogoniha gili bu wini nga. Bi ogoni ogodagua gilibu wini nga. Í̠na bi uruni u paluwa hale hariyagua nde abale heyabe. Bibahendengi í̠na Anduane Homogo gubalini halu ibugua í̠ mo karulape halu haabo helo bi lolene nga.}

15 Gabua tara tara bu karu ti dameneru baba mandagi haga kago ainde wali agali ti damene heba mandagi haga dege hene. 16 Mbirale ema bialu piaga bedaru tigua nde ti aria bedaru baba mandagi haga. Anidagua dege wali agali tiguabi nde tini ale dege dege mandagi haga. 17 Ai biango dudu irabuha hagane bu karume nde nogo sibi igini bu karu baba mandagi ibaga bu holobadabe. Anidagua dege wali agali ko biaga bu karu tibi nde wali agali ko nabiaga bayale karu heba mandagi ibaga bu naholebira. 18 Ai biango gabua irabuha haga kagome biango maru hinini andaga haga kago baba mandagi bayale holebirabe. Anidagua dege homogo kagome yagibano heba mini mo mbiraore howa mandagi naholebira. 19 Dindi ko wali agali nahaga iba dalu naibaga ngagoha dege timbuni laiono gabua kagome nogo dongi igini kago balu naga. Anidagua dege homogo bu karume yagibano bu karunaga mbirale ngaru nai haga ka. 20 Wali agali mine haga bu karunaga deni í̠ni mo dindiha ho holenego koorene ko nga lo manda bu hagaya. Anidagua dege homogo bu karu tigua tinaga miniha yagibano bu karu ko galone nabulene ka lo manda bu haga ka. 21 Homogo karu pilabehe kagola ibu aria karume mo hongo ho helaga. Anigo yagibano karu pilaragola ti damene karume pilelo wahalu ti piaga. 22 Homogo kago piledagola wali agali dewaoreme ibu biamogo biaga. Ibugua ti baba ogoale bimi̱ya lalu habo nalolene bi lo wiragola wali agali tigua bi ogoni karulapeda lo manda biaga. Anigo wali agali homogo ndo karu piledagola wali agalime ogonihondo keba halu lai lo miaga. Yagibano pilayagome bi bayale lamirago lelowa tiguabi ogoni hale nahaga. 23 Anigo ai homogome bi larangi wali agali tigua ema nabiore baya hangu hale ho howa tigua bi ogoni bayale duninida lagane ka. Anigo homogo ndo karume bi laragola ti hale nahe howa lalu, Ogoni í̠ ai kebe laga ka. Ani bialu yagibano mbirago bi layagua wali agali tigua ge perege baga ka.

24 Muni mbiraleru mana ko bulene ngagoha howa ndo mini wiagua ogoni ko ndo bayale nga. Anigo wali agali mana ko biaga bu karu tigua lalu, Wali agali yagibano holenego mana ko nga lagane ka. 25 Mini wali agaliha ngagome tini turu ho kema keba ho kema lalu tinaga wanakuime latagi haga ka. 26 Ai wali agali tinaga bu miniha dungulo heagua nde tinaga wanakui bode wále holebira. Anigo tigua mini bayale wu karu latagi hole howa tinaga embone tandaga haga.